شوصون مالحين بدون زبدة التوريق..

الوصفة:

120غ فرينة

60غ اي نوع مارغرين ماشي تاع الباطة تاع الكارط أو زبدة(استعملت مارغرين ستار) تكون فالكونجيلاتور مقطعة مكعبات من قبل

بيضة

رشة ملح

رشة سكر

ملعقة زيت

ربع كاس ماء بارد جداا

الطريقة

نحط الفرينة.. الملح.. السكر.. الزيت.. ونجيب قطع الزبدة نرمدوهم فالفرينة ونسكرفجوهم فالجهة الخشينة كي نكمل الكمية كامل نخلط بصباعتي فقط ونزيد الماء البارد ونلمها بلا ما نعجنها.. نرش شوية مايزينة على سطح العمل ونفتح العجينة للي تحصلت عليها متسطيل ونطوي على ثلاثة كيما عجينة التوريق ونزيد نفتح ونرش قليل من المايزينة ونعاود نطوي نعاود العملية زوج مرات راح نتحصل على عجينة رائعة وقطع الزبدة تبقى ظاهرة ونحطها فالثلاجة مدة نصف ساعة أو أكثر أو مدة تحضير الحشو (لازم يبرد مليح مانديروهش سخون باش ما تتعجنش لداخل وتتورق) أنا استعملت لحم مرحي متبل ثوم وشوية بصل وزعيترة ورشة قرفة وفلفل أسود وملح لازم ينشف تماما من السوائل.. وفي الأخير زدت شوية جبن مبشور..نخرج العجينة تاعي من الثلاجة ونفتحها على سطح العمل برشة مايزينة بسمك 3 أو 4 ملم و نطبع الدوائر.. نجيب حبة البيض نفصل الصفار عن البياض.. البياض نلصقو بيه الحبات والصفار نطلوه باش تعطينا لون زوين. نحط الحشو تاعي ونطلي الأطراف ببياض البيض ونغلق بالشوي فقط ما نضغطوش عليها راح تلصق.. نكمل الحبات كامل بنفس الطريقة (والعجينة للي تبقى نحطو قطعة على اختها مانعجنوهاش ونعاود نخدم بيها)نطلي الحبات بصفار البيض ونحاول مايقيسش وين غلقنا العجينة باش تتورق لأنه لو سال عليها البيض ماراحش تتورق.. نجيبو عود ونديرو زوج ثقبات من فوق نحطوها فالكونجيلاتور ونسخنو الفرن (علاش نحطوها فالكونجيلاتور ؟؟ لأنه لو نخلوها في حرارة المطبخ الزبدة راح تذوب ومانتحصلوش عالنتيجة المطلوبة) كي يسخن الفرن مليح ندخلهم يطيبو (من الأفضل نفرشو ورق الطهي) على درجة حرارة 170 واذا عندك فور يشعل من فوق ومن تحت نشعلو عليها من لفوق ولتحت في نفس الوقت على 160..

والنتيجة النهائية مورقة وخفيفة ومقرمشة وبالنسبة ليا أحسن من عجينة التوريق تجي ميدمة وغالبا ما تبقى معجنة لداخل..